"اهدوا كفاية خلتوها خل ".. شاهد: عمرو أديب يرد على انتقادات فيلم "النونو" لأحمد حلمي
صحيفة المرصد: رد الإعلامي المصري عمرو أديب على الانتقادات الموجهة للفنان أحمد حلمي بسبب فيلم "النونو"، الذي يستعد لتصويره، من إنتاج هيئة الترفيه بالمملكة.
الدنيا تبان مقلوبة
وقال خلال مقطع فيديو نشره عبر حسابه الرسمي بموقع التواصل الاجتماعي "إكس": "من الأول عايز أتكلم عن موضوع أحمد حلمي فيلم النونو.. الدنيا تبان إنها مقلوبة لكن هي مش مقلوبة هي معدولة بس اللي قلبها اللجان إياها، لأنه في لجان مخصوصة مدروسة مدسوسة هي اللي شغالة على الموضوع ده، وتصدر إنه إهانة لسمعة مصر وللشعب المصري، لكن إحنا عارفين طبعا إن ده مضروب ومدبر ومتظبط، وفيه ناس ولاد حلال غرضهم يقفوا جنب البلد ويدافعوا عن كرامتها".
فيلم عسل أسود
وتابع: "مش أحمد حلمي ده ابنكم وأخوكم وصاحبكم، هو حلمي أتولد من الحيطة ما هو موجود من زمان عمل مليون فيلم، أنت بتثق في الناس إزاي، فجأة تقرر أن أحمد حلمي باع بلده ودينه وحياته عشان شوية فلوس، إيه كل الكلام ده، أنتم متعرفوش مين أحمد حلمي لما عمل عسل أسود ونزل لقى البلد منيلة بستين نيلة وكل حاجة وعكسها وقتها كان أحمد حلمي".
شركات نصب
وأردف:'"إحنا بنتكلم عن حاجة.. النائب العام المصري بيحقق مع 16 شركة نصبت على مصريين، وطالع تهاجم قبل ما تشوف الفيلم وقبل ما تعرف إيه الحكاية والرواية، الموضوع لسه بيتكتب وبيتظبط.. هو فيه إيه؟!
سمعة مصر
وأضاف:"أشمعنى دلوقتي بقى النصاب دونًا عن كل النصابين والبشر والحياة هو اللي هيبوظ الدنيا ويسيء لسمعة مصر، الفن فيه كل حاجة، هو مش دوره يوري الإنسان الكويس العظيم الطيب، الفن دوره يبين المشاكل والمصايب، والناس تعرف النصابين عاملين إزاي وتاخد دروس وتتعلم منهم وتفهمهم"
كفاية خلتوها خل
واختتم قائلا: "واضح بعض الناس التوليفة كلها مش عجباهم أو فيه حاجة من التوليفة مش حلوة وعاملة حساسية وفيه حتة من الحبكة الدرامية عاملة دوشة نفسية.. أرجوكم اهدوا كده واحكموا على الفيلم بعد ما تشوفوا، اهدوا وشوية ثقة في الناس والبشر وفي نفسنا وحياتنا، كفاية بقى خلتوها خل، ارحمونا شوية".
التعليقات (37)
التعليقات مغلقة